2016.01.29
Zein?

Zein?

  • 1997 - 2008
  • Sopuerta (Bizkaia)
  • Rocka

Zein? rock taldea Barakaldo eta Sopuerta herrien artean sortu zen, 90. hamarkada bukaeran. Ama Say taldea desegin zenean, Gontzal Bilbao eta Karlos Alonso musikariek talde berri bat eratu zuten Kepa Bilbao (ahotsa ta gitarra) eta Lino Prieto jaunaren (gitarra) laguntzaz. 1997. urtean, “Bautista Basterretxe” kantu herrikoiaren moldaketa bat egin zuten Ikastola berria eraiki dezagun Zuberoan bildumarako. Sei urte beranduago, 2003. urtean, Zein? taldearen lehen diskoa agertu zen, Seiehun eta bi. Ordurako, Julio J. Ortiz eta Joakin G. Picaza (Ama Say) musikariek hartua zuten Karlosek eta Linok utzitako lekua. Zein? taldekoek rock erritmoekin jolas egitea gogoko zuten, pop, blues edota noise nahasketak gordinak lortuz. Seiehun eta bi izenburuaren atzean istorio bitxia dago, izan ere, Gontzal Bilbaoen bi seme alabek, kasualitatez, erietxe bereko 602 gelan jaio baitziren.

ZEIN?

Kepa Bilbao, Gontzal Bilbao, Julio J. Ortiz eta Joakin G. Picaza, Zein? taldeko kideak.

2004. urtean, Zein? taldekoek, Bilbo Hiria Pop-Rock lehiaketa barruan, Euskal Talde Onenaren saria irabazi zuten eta bere bigarren diskoa, Photograma (Metak) ekoiztu Ondarroako I.J.M. estudioetan. 2008. urtean, Zein? taldearen hirugarren lana agertu zen, Ahari talka, Noizpop zigilupean. Pop rock musikaren aldeko apustua eginez, melodiak eta gitarra indartsuak jaso zituzten, psikodelia eta giro ilunagoekin. “Guk ez dugu musika bitxirik egin nahi, gure asmoa sentitzen duguna transmititzea da. Bilbo aldeko Ezkerraldean bizi gara, leku ezerosoa, lantegi asko dituelako eta, euskara aldetik, nahiko eskasa. Alde horretatik, talde txikia gara, baina euskal kulturari gure hondar aletxoa eskaintzeko ahalegina egiten dugu”.

Atzera

Mapak (Bonberenea, 2005-05-21)

Animalia perfektua

Kolorezko diztirek
inguratzen naute
etxeko egongelatan botata,
azkenengo kontuak pantaila lauean,
irensten ditut, banan banan.
Zer naiz?
Animalia perfektua!!
Hatzamarra mugituz
hamar mila mezu
bidali ditzaket momentuan,
imagina guztiak ei ditut eskura,
zer ikusi ez dakidan arren...
Soilik dei bat eta txartelaren truke
ordain ditzaket gauz hoiek,
irribarrea beti eduki ahal det,
epeka ordaindu ditzaket gauz hoiek...
Zer naiz?
Animalia perfektua!!