2016.01.29
Zein?

Zein?

  • 1997 - 2008
  • Sopuerta (Bizkaia)
  • Rocka

Zein? rock taldea Barakaldo eta Sopuerta herrien artean sortu zen, 90. hamarkada bukaeran. Ama Say taldea desegin zenean, Gontzal Bilbao eta Karlos Alonso musikariek talde berri bat eratu zuten Kepa Bilbao (ahotsa ta gitarra) eta Lino Prieto jaunaren (gitarra) laguntzaz. 1997. urtean, “Bautista Basterretxe” kantu herrikoiaren moldaketa bat egin zuten Ikastola berria eraiki dezagun Zuberoan bildumarako. Sei urte beranduago, 2003. urtean, Zein? taldearen lehen diskoa agertu zen, Seiehun eta bi. Ordurako, Julio J. Ortiz eta Joakin G. Picaza (Ama Say) musikariek hartua zuten Karlosek eta Linok utzitako lekua. Zein? taldekoek rock erritmoekin jolas egitea gogoko zuten, pop, blues edota noise nahasketak gordinak lortuz. Seiehun eta bi izenburuaren atzean istorio bitxia dago, izan ere, Gontzal Bilbaoen bi seme alabek, kasualitatez, erietxe bereko 602 gelan jaio baitziren.

ZEIN?

Kepa Bilbao, Gontzal Bilbao, Julio J. Ortiz eta Joakin G. Picaza, Zein? taldeko kideak.

2004. urtean, Zein? taldekoek, Bilbo Hiria Pop-Rock lehiaketa barruan, Euskal Talde Onenaren saria irabazi zuten eta bere bigarren diskoa, Photograma (Metak) ekoiztu Ondarroako I.J.M. estudioetan. 2008. urtean, Zein? taldearen hirugarren lana agertu zen, Ahari talka, Noizpop zigilupean. Pop rock musikaren aldeko apustua eginez, melodiak eta gitarra indartsuak jaso zituzten, psikodelia eta giro ilunagoekin. “Guk ez dugu musika bitxirik egin nahi, gure asmoa sentitzen duguna transmititzea da. Bilbo aldeko Ezkerraldean bizi gara, leku ezerosoa, lantegi asko dituelako eta, euskara aldetik, nahiko eskasa. Alde horretatik, talde txikia gara, baina euskal kulturari gure hondar aletxoa eskaintzeko ahalegina egiten dugu”.

Atzera

Mapak (Bonberenea, 2005-05-21)

Moztu arren

Lan fina,
hilero mila euro,
kotxe azkarrena zurea bada.
Izerditan esnatzen bazara edonoiz,
pastilak hartu, lasaitu zaitez...
Gogoak astintzen nau,
beldurrak gelditzen nau,
gogoak astintzen nau,
korapiloa askatzen!!
Haizea aurpegian ematen,
berriz sentitu nahi dut,
hautsa bihurtu baino lehen,
sentitu gure poxpoloak erretzen duena.
Gogoak astintzen nau,
beldurrak gelditzen nau,
gogoak astintzen nau,
korapiloa askatzen!!
Ausartu naiz,
sarerik ez ikusi arren,
hariak kendu ditut,
moztu naizen arren.
Katea apurtu dut,
mugitzen hasi naiz,
orain nere bidea
argi asko somatzen dut...
Moztu naizen arren!!