Xabier Zeberio musikagile tolosarraren sorkuntzatik abiatzen da musika klasikoan nahiz modernoan esperientzia zabala duen musikari talde honen errepertorioa. 1999tik hainbat disko kaleratzeaz gain, nazioartean aritu dira, eta askotariko artista entzutetsuekin kolaboratu dute. Harkaitz Cano idazlearen hitzetan, «Alos Quartet musika estilo besterenezin baten jabe bihurtu da azken hogei urteotan, merezimendu osoz. Saloia eta herriko plaza, musika klasikoa zein herrikoia, palazzoaren ateko alde biak aintzakotzat hartu eta komunikatzean datza haien bertuteetako bat». Francisco Herrero, Loreña Nuñez eta Alejandro Saul musikariek osatzen dute taldea, Xabier Zeberiorekin batera.