Denboran ondutako
ikasgaiez beteta,
apain-apain darama
helduen mozorroa.
Gauean, biluzten denean,
egia azalean.
Ez duzu galdu behartu gabeko irria,
begi-ninien egia,
eskuekin mintzatzeko trebezia…
Dardararik egin gabe
birrasmatzen zinela
esan zenidan, baina…
mozorro truke hutsa!
Gauean, biluzten denean,
egia azalean.
Ez duzu galdu behartu gabeko irria,
begi-ninien egia,
eskuekin mintzatzeko trebezia…
Urte latzek eraikiarazi dizuten
sentimendu harresiak
ez dezala mugatu zure argia.
