Somaliara eskoltekin
doazen arrantzaleak,
“ertzaina eta laguna”,
erdaldun abertzaleak,
liderrak agindu dezan
egindako asanbleak,
iraultzaile damutua,
lokatzetan jeltzaleak,
ehiza eta zezenen kontra
dauden haragi-jaleak,
bakegileak kartzelan
dauzkaten bakezaleak
lapurrak hegazkinetan,
kamerez lepo kaleak,
ta beldurra ematea
atariko eskaleak.
Zenbat Gernikako koadrok
du parean telebista?
Martxoak 8an more
9an matxista,
zergatik daude beterik
SGAE bertsolariz ta
putetxeak monogamoz?
Alarde militarista,
udan Saharako haur bat
hartzen duen arrazista,
furgonan “Nuklearrik ez”
eskatzen ekologista,
herrian apalankatu
uztailean brigadista,
eztarri urratuetan
Coca Cola baten txispa.
Txikitero anti-drogak,
“made in Taiwan” ikurrina,
Inoiz Larrun igo gabe
Himalayara trekinga,
palestinodun Barbie-ak,
agro-pijoen lurrina,
Xiberü zale askoren
hegozentrismo zikina
ekologiko jateko
Peruko kalabazina
ametsetako ezkontza
lagunen bizkar egina,
Pirritxen ile arrosa
eta Porrotxen urdina
zugan ikusten dudana
nigan ikusi ezina.
