Ia hogei urte daramatzate elkarrekin jotzen Berako (Nafarroa) talde honetako kideek, baina bi hamarkada hauetan hiru disko baino ez dituzte argitaratu. Batetik, gauzak patxadaz egitea maite dutelako, euren erritmora, denbora osoa taldeari eskaini gabe; bestetik, taldearen musikak, rocka izanagatik, egitura bihurri eta konplexuak eta ñabardura ugari gordetzen dituelako. Taldekideetako batzuk beste proiektu batzuetan egon dira, Onddo, Petti eta Etxeko Uzta eta On Benito, kasu.