2021.06.28
Mutürbeltz

Mutürbeltz

  • 2012 - 2013
  • Urretxu, Hondarribia, Bera
  • Hard-rocka, Rocka, Rock&rolla

Zaharrak berritzeko gogotsu dator Mutürbeltz. Bi oinarri dituen zutabe sendoa. Edo alderantziz. Urretxu rock city-n, The Hot Dogs taldea banatu orduko segitzeko beharra sentitu zuen Iñigo Agirrebalzategi gitarra jotzaileak. Bera rock city-n, sentsazio berbera izan zuen Mikel Larratxe abeslariak, Sexty Sexers banda lozorrora bidali zutenean. Bi arima galdu amildegiaren ertzean. Bertara jaustean elkarrekin topo egin eta muturrak belzten hasi ziren. Zikintzen. Batek musika eta besteak hitzak. Lanak banatu orduko sortu ziren lehen kantak, soilik taldea osatzea falta zen. Gutxira agertu ziren Eñaut Balentziaga (Kabul, Zura) bateria eta Aitor Castillo “Txiki” (Plan B, Boogie Van) baxu jotzailea. Biak zikintzeko prest.

Oinarriei tiraka rock talde sendoa osatu dute. Aipatu bi taldeen erdibidean daude. Australiatik Euskal Herrirako ibilbidean. Kanpora begira jarri dira, zinez gustuko duten hori egiteko. Begi lizunarekin, esku klasikoarekin, eta noski, mutur beltzarekin. Ez dirudi lehen saiakera, baina bada. “Amildegia maite” estreinako long play edo lan luzeak zaharberritze lan zaindua islatzen du. Eskarmentuaren akordeak eta esanak. Inolaz ere berritzaileak. Inolaz ere munduko beste txokoetan entzun ez direnak. Baina badute zerbait. Agian da kantuen sinpletasun biribila, agian doinu klasikoekiko maitasuna, agian transmititzen duten bizitasuna… Agian da amildegia bera, amiltzera bultzatzen zaituena.

Testua: Inaxio Esnaola

Harro

Hanka-hutsik zure errautsetatik ibilia nintzen, harro.
Kolpez, kolpez, kolpe irabazitako urrats bakoitzaz harro.
Bideaz galdegiten didan bakoitzari erraten diot ‘segi niri’,
geldiezina den olatuaren aparra bainaiz ni.

Zerua muga bakarra dut infernura bidean noala.
Zerua muga bakarra dut bihotzean kolpeka dudana.

Zakurren zaunkek gortu ahalko banaute,
bihotz-kolpeen hotsa ezin isilduko dute.
Eta berriz altxatuko naiz, eta berriz zutituko naiz,
eta gora begira erranen diat ‘segi niri’!

Zerua muga bakarra dut infernura bidean noala.
Zerua muga bakarra dut bihotzean kolpeka dudana.

Odola edaten infernura bidean noala,
ez da aski bide nekezik infernura bidean noala,
ereindakoa nire eginen dut infernura bidean noala,
zoriona topatuko dut infernura bidean noala.