Aitzakia bat behar da zerrenda bat egiteko. Bihotzean arakatzen hastea ez da komeni eta onenen zerrenda egiteak norbere buruarekin eztabaidan hastea dakar. Horregatik joan naiz 90. hamarkadaren erdialdera, Durangora etortzeko, Berbaro tabernara. Kontzertuak antolatzeari ekin genion orduan eta, zaharrunoarenak jotzen hasi barik, esango dut garai hartan Durangoko tabernetan ez zela zuzeneko musikarik izaten.
Eguenetan ekin genion. Tabernako biltegitik ehun kiloko tarima hura atera eta geure burua baino hobeto zaintzen genituen JBLak jartzea abentura iniziatikoa izan ohi zen. Tabernaren akustikari buruz berriz, hobe ezer ez esan.
Bertatik igarotako bakarlari eta taldeekin osatu dut zerrenda, aurrerago Berbaro tabernatik Plateruenera eroan gintuen eldarnioaren hazi izan zirelako beraiek ere, zelanbait. Kontzertuen osteko afari haiek ere badirelako nire soinu bandaren parte.
