Zerrenda honetarako kantuak aukeratzeko kantari eta taldeen zerrenda begiratzen hasi naizenean, ohartu gabe atzera begira jarri naiz; kantuak beste oroitzapen askorekin lotuta etortzen zaizkidan garai haietara, naizena izatera ikasten ibili nintzen espazio/denbora horretara. Orduko kantuek leku berezia izan ohi dute gure bihotzetan, ez hobeak zirelako, ez jada 'halakorik' egiten ez delako, haiekin ikasi genuelako baizik. Horregatik geratu zaizkit lotuta lehen muxuei, kuadrila sortzeari, mundua nire begietatik ikusten hasteari...
Gainetik kendu ezin dudan afizio eta neurri handi batean lanbide daukadan argazkilaritzarekin ere lotura handia du musikak. Musikaren 'industriari' esker lortu nuen bigarren eskuko F2 hura erosteko behar nuen dirua eta kamera horrekin musika talde bati egindako argazkiak izan ziren argitaratu nituen lehenak; orduan ez banekien ere, aurrerago nire lehen argazkilari soldata lortuko nuen argitalpen berberean.
Entzun! euskarazko lehen musika aldizkariarako ere ibili nintzen argazkiak egiten, ofizio hau zer izan zitekeen ikasten nenbilen une berean
Baina musika ez dut hori bakarrik, ez da iragan bat soilik, ez da gaztaroko oroitzapen multzo bat. Musikak presentzia du ene bizitzan oraindik ere eta bizipen berriekin lotzen zait: ez dut berriro lehen muxurik emango eta kuadrilak utzi dio orduan zena izateari, baina geroztik lehen aldiz hil zitzaidan laguna, lehen aldiz izan haurra, galdu gurasoen etxea... Bizirik nagoelako jarraitzen ditut izaten 'lehen aldiak'.
Hemen hamar kantu aukeratu ditut, baina ez dira dauzkadan hamarrak. Bihar beste zerrenda bat egin nezake eta etzi beste bat eta beste bat... Bizirik gaudenez, gaur askorik esan ez didan kanta bihar oroitzapen berri batekin lotu dezakedalako.
