Erretzea utzi duen bati, zigarreta bat berriz piztuaraztea bezala da, kantu hauen berriz entzutea. Adikzioa hor da, Badoken kantutegiaren kontsumitzen, orenak pasatu ditut.
Oskorri, "Sautrela"
Hamabost urte... eta gero hau! izan da erosi nuen lehen K7a. Nere irakurgailu xaharrean burutik buru entzuten nuen. Pilak laster husten ziren, zalutasuna galtzen zuten kantuek, eta halarik ere gelditu arte entzuten nuen! 2015eko Korrikaren kantua inspiratu duen "Sautrela" kantuarekin, oroitzapenak lurretik berriz ateratzen dira.
Eltzegor, "1979-1-13an eta 1980ngo. urtean"
Ebihotz diskoko doinuak ilunak, hunkigarriak dira. Erahilak, zaurituak edo borrokan hil diren euskal militanteen ohoretan egin kantuek, ileak xut emanarazten dauzkidate. Kantu honek Peixotoren kontrako Donibane Lohitzuneko erasoa aipatzen du. Diskoaren hastapena 3 botzetan biziki ederra da, piano ilun bat sartu arte: emozio handia.
Hertzainak, "Hertzainak"
Euskal rockaren monumentu bat. Kontzertutan ikusi dudan lehen taldeetarik izan da. Gogoz ezagutu ditut hauen kantu kasik guziak. Iparraldeko kantariak entzuten nituen, elizatiarrak, eta Hertzainak-en hitz guziak ez banituen ulertzen ere, mezu gordin eta zuzen horiek errebelatu naute. Eta musikalki, zer maila!
Delirium Tremens, "Laino ilunak"
Gaztetan muntatu lehen taldearekin, berriz hartu genuen lehen kantuetan izan zen "Laino ilunak". Kantu estruktura sinpleak baina eraginkorrak, eta Andoniren botza. Nere anaia gehiena eskertzekoa, ainitz euskal talde ezagutarazi baidazkit.
Baldin Bada, "Xirrika"
Rocka, ska edo reggaea nahasten zituen taldea. Neretzat musikak bezain garrantzia zuten hitzek: zuzenak (txapel-gorri), gordinak (xirrika), edo sentsibleak (landa ezazu zure hazia). "Xirrika" kantua, sexu libertateaz, reggae doinu batean. Horrelako hitz guti entzuten ziren euskal rock talde militanteen artean, eta gaur egun ere!
Negu Gorriak, "Arrano beltza"
Hauei zor diet kanpoko taldeei nire belarriak idekitzea. Musika berriak ekarri dituzte Euskal Herrirat, baina euskal rockaren enbaxadore izan dira kanpoan. Borreroak baditu milaka aurpegi diskoak 20 urte pasa ditu, eta ez da modaz pasatu. Lan ainitza, borobila, rapa, hardcorea, rocka eta gehiago: belarrondoko on bat! "Arrano beltza" kantuak erdiesten du Joxean Artzeren poesia eta Public Enemy uztartzen. Belaunaldi berriek entzun behar duten diskoa.
Dut, "Sortu eta haztea"
Hondarribiar hauek euskal musikan Objektu Hegalari Ezezagunak izan dira. 10 urteren aitzina bazuten, bere garaian M-ak taldea bezala. Eboluzio handia: lehen disko bikaina boskote bezala, bigarren lan desbideragarria hirukote formatuan, eta azkenean erritmika berezia, giroa, indarra. Nere hautua liteke "Sortu eta haztea", At diskoko zati gustukoena dudalakotz.
Sohano, "Ziburuko haizea"
Itsasaldeko balada hau, kasik ye-ye, Nahiaren botz zuzena, sobera egin gabe, hitzen poesia, lasaigarriak dira doinu hauek. Taldea bazterrerat utzi badute ere, Manu Matthys-ekin duen proiektu elektroagoa entzutekoa da!
Pi.L .T., "Kontzientziaren ateak"
Beste talde bat indar handikoa. Zuzeneko ezin ahantziak, erokeria! Rafa Rueda ikustean lau ile-motsekin buruan, Aitor teklen gaizki tratatzen! Disko batetik besterat hauek ere jakin dute aldi guziz kolore berri bat jartzen. «Kontzientziaren ateak» eta Minus diskoko kantuen ez ohiko estrukturak gustuko ditut.
Kerobia, "Isburt"
Nafarroatik jin freskotasuna, estetikoa grafismo aldetik, baita musikalki ere, egiazko euskal pop-eroak. Ideia berriak promozioa egiteko momentuan, Creative Commons lizentziarekin diskoak eskainiz, Supernova azken ekoizpena 1.000 ale pertsonalizatutan salduz. Bainan 13 urteren buruan, agurraren tenorea jin zen. Agian izanen dira beste batzuk hauen segida hartzeko.
