Kuadrillan rock taldea genuen: Sexty Sexers. Nik ez nuen instrumenturik jotzen, baina argazkiak atera eta bideoak grabatzearen aitzakiarekin entsegu eta kontzertu guztietan egoten nintzen. Haiei zor diet lehen gaztaroan (2000 hamarkada), nire edukazio artistikoa Bidasoaldeko musika mugimendua izatea.
Komikilari lanetan, musikak emandako inspirazio guzti horri forma emateko moduak bilatu izan ditut: aukera garrantzitsuena Mikel Laboaren komikiarekin etorri zen (Ni ez naiz Mikel Laboa, Elkar 2022), baina hori baino lehen, gustuko nituen kantekin komiki laburrak edo komiklipak egin nituen hainbat aldizkaritan. Ariketa interesgarria izan daiteke kantak entzun bitartean komikiak irakurtzea. Hor doaz loturak: Bizi ala hil, Behor begiak so, Hamabi lagun hilkor, Ez da izango, Lera zakurren balada, Sekretua, Laba ibaiak eta Piztu da piztia.
Zerrenda osatzeko bi kanta gehiago: bata, komiklipa marrazteko gogoekin geratu nintzen Zerutik lurrera (Kaskezur). Eta bestea, Sexty Sexers taldetik eratorritako azken proiektuaren kanta bat, Izu hau (Izukari).
