Iazko udaberriarekin batera Loraldia Festibala jarri zen abian Bilboko bihotzean. Lore Jokoak eta beraien sortzailea izan zen Anton Abbadia gogoan, festibalak kultur adierazpen guztiak plazaratu zituen asteburu batez. Aurten bigarren edizioa dakar eta apirilean zehar kultur festa handia loratuko da lerden eta kementsu. Apirilaren 9tik 24ra musikak baratze handi bat izango du. Hamaika kantu entzugo dira hamaika kontzertutan. Zerrenda honetan Loraldiaren musika mapa aurkeztu nahi dizuet, festibalean eszenaratuko diren hainbat altxor deskubritzeko asmoarekin.
1.- "Txori berriketaria" (Maddi Oihenart)
Zuberoako Arbaila oihanean kokatuko ditugu aurreneko koordenadak musika mapan. Zuhaitz artean bizi den Oihenarten boz gardena euskal musikagintzan dugun harribitxietako bat. Zuberoako tradiziotik abiaturik ekoizpen moderno eta garaikidea sortzeko gaitasun aparta du. Naturari begirada zirraragarria da "Txori Berriketaria“. Arbaila oihaneko txoriek Maddiren kantuak xuxurlatzen dituzte edo alderantziz izango ote da?
2.- "Oreinak" (Anari)
Asfaltoko lorea dugu Azkoitiko kantaria. Anariren rock elektrikoak unibertso poetiko sakon bat eratu du. Oreinak, zebrak... gizakiaren barne emozioak adierazteko basabereak. Loraldian Maddi Oihenartekin batera arituko da eszenatoki berean. Bi mundu. Bi paisaia musikala. Musikagintza garaikidearen bi sortzaile ezinbesteko.
3.- "Sustraiak han dituenak" (Mikel Laboa)
“Nekez uzten du bere sorterria sustraiak han dituenak…”. Nekez ahazten ditugu gure musika sustraiak. Loraldiak Mikel Laboa ekarriko du eszenara. Inoiz izan dugun sortzaile berritzailerik handienetakoa. Loraldian, berriz, Laboa jazz bihurtuko da, Iñaki Salvador, Maria Berasarte, Ainhoa Ortega eta Angel Unzuren eskutik. Bi emakumezko boz zilarrezko ahotsa moldatzeko. Laboa jazz musikaren itsaso bideetatik nabigatzeko modu bat. “Ez du liliak udaberria uzten…”, kantuak dioen bezala.
4.- "Bidaiari ekina" (Alos Quartet)
Alos Quarteteko biolin erromantikoek bide berrietatik eramango gaituzte bidaian. Bidaia musikal honetan sokek agitzen dute. Dena den, “Bidaiari ekina” salbuespen bat da. Harkaitz Canok (nola ez!, 2015ean kantu zerrenda amaiezina idatzi duen idazlea) berbak jarri dizkie sokei eta Eñaut Elorrietak boza. Bidaiari ekinez egingo ditugu bide berritzaileak. Eszenan Alos Quarteteko lau musikariekin batera, Oreka Tx eta Aukeran dantza taldekideak izango dira Garden (Lorategia) hau osatzen.
5.- "Bihotz ezkutua" (Enkore)
Bilboko Errekalde auzoan bildu da laukote gazte hau. Belaunaldi berri baten adierazpena. Hardcore melodikoaren bidez dantzan jartzen ditu ikusleak eta Loraldian E diskoaren aurkezpen berezia egingo du. Lagunak eta kolaboratzaileak batu eta musika festa handi bat sortzeko asmoarekin igoko da Kafe Antzokiko eszenatokira.
6.- "Haizeen meneko" (Aguxtin Alkhat)
Willis Drummond taldearen inguruan hainbat egitasmo musikal loratu dira. Aguxtin Alkhatek horretaz baliatuz kanta xorta eder bat sortu du. Harmonikaren doinuek Amerikako landa zabaletara eramaten gaitu. Horra hor Nafarroa Behereak eman duen rock kantugile gazte xarmangarria. Ipar haizeak ekarriko du Bilboko La Riberara.
7.- "Haritzaren memoria" (Beira)
Bertsolaritzak hamaika kultur adierazpen sortu du azken bi hamarkada emankorretan. Musika alorrean ere hainbat talde plazaratu dira. Beira da uztaren azkenetako emaitza. Jon Martin bertsolaria Igor Arruabarrena gitarristarekin bildu zen taldea osatzeko. Pop-rock doinuek hitz landuak dakartzate. Kantu honek, hain zuzen, Aritxulegiko gudarien baratzaren inguruan izan ziren atxiloketak salatzen ditu.
8.- "Maitia nun zira" (Beñat Axiari)
Pirinioetako ipar aldean badira zenbait sortzaile berritzaile euren musika lana ikerketan oinarritzen dutena. Beñat Axiarik inprobisaziotik abiatzen du sormena. Ez ohiko kantuak plazaratzen ditu eta zuzenean ikusleak aho bete hortz lagatzeko izugarrizko gaitasuna du. Sortzailearen ahots jokoak perkusioarekin nahasten ditu eta emaitza harrigarria izan ohi da. Mixel Etxekoparerekin batera arituko da kontzertuan.
9.- "Leon eta Maurizia's fugue" (Mixel Etxekopar)
Beñat Axiariren lagun mina dugu Mixel Etxekopar eta bidaide sormen garaikidean. Mixelek ere inprobisazioa du gustuko. Lur soinuetatik emaitza moderno eta gaurkoak sortzen ditu. Kantu honetan Bizkaiko bi musikari mitiko, Leon eta Maurizia, hartu ditu gaitzat eta azken emaitza erabat harrigarria da. Gogora ekarri nahi dugu Maurizia izango dela Loraldian Aukeran dantza taldeak aurkeztuko duen koreografia berriaren ardatza.
10.- "Suziri" (Nizuri Tazuneri)
2015a izan omen da euskarazko raparen urtea. Mugida honetan Nizuri Tazuneri nabarmentzen den altxorra da. Talde berri hau Norzzone eta Faniren proiektua da. ”Euskaraz bizi nahi dut, esan ozenki”, aldarrikatzen du bikoteak. Elektronika doinuek zabaltzen dute eremu berri bat euskal musikagintzan. Etorkizunaren soinu-banda izango ote da?
11.- "Zaude lasai" (Mursego)
Loraldian arte arlo ezberdinen arteko elkarlana dugu gustuko. Literatura eta musika uztartzea, adibidez. Harkaitz Cano eta Mursego elkarrekin arituko dira Porto izeneko ikuskizunean. Mursegok giro musikal ezohikoak sortzeko ahalmen nekaezina du. Canok, berriz, istorio iradokitzaileak idazten ditu. Biak ala biak emoziogileak.
12.- "Ilun ikarak" (Igelaren Banda)
“Etorkizuna perfektua balitz” titulatu du Andu Lertxundik Loraldia ixteko prestatu duen ikuskizuna. Bertan, eszena berean Lertxundiren literatura, Miren Amuriza eta Maialen Lujanbioren bertsoak eta Igelaren Bandaren musika uztartuko ditugu. Igelaren Bandak, oraingoan, bertso tradizioa jazz bilakatu du. “Ilun ikarak” melodiak Imanol kantaria ekarri digu gogora. Melodia xarmangarria festibal berritzaile honi amaiera ezin hobea emateko.
