Panpin puskatuen fabrika

Irri zuri, jantzi garbi, 
Jaun-Andre perfektuenak: 
Panpin puskatuen fabrika 
Aurrean duzue. 
Izaki onartezinak 
Egiten ditugu bertan, 
Auzokoen barregarri 
Izan daitezen. 

Hipotekadun nomada familia, 
Ordulari gabeko langilea. 
Bertigoa duen trapezista 
Josi gabeko marasma sarean. 
Ezpain gabeko tronpetistaren 
Kontzertutara hurbildu zen gorra. 
Suhiltzaile piromano bat 
Pista erretzen dantzan. 

PANPINA PUSKATUA, URRATUA, ZARA. 

Txakur tristeen maitalea den 
Bizitza bakarreko katua. 
Jolasik ezagutzen ez duen haurra, 
Beti euritan dagoen basamortuan. 
Margolari daltonikoaren 
Mihisean udazken koloreak. 
Haizeak astintzen ez duen 
Bandera trapu zaharra. 

Egin duzu irria kalean, 
orbainak ezkutatu ostean?