2017.10.16
Rock and rollak hiltzen jarraitu behar duela zioen kantu batek, eta horrela iritsi gara infernura. Zorionez, bertatik aterako gaitu Hondarribiko Velozet taldeak. Infernuko ateak zabaldu dituzte Deabru berri baten jaiotza lehen diskoarekin, eta euskarazko rockak bizitzen jarraitzeko aukera du. Boskoteak zintzo itxura du, baina gaiztakeriak eta kultuzko filmak gustuko dituzte. Bederatzi kantuetan ezaugarri horiek topatuko ditugu, eta, noski, rock zuzena. “Uhin gaizto”, “Hilerri ondoan”, “Berpiztuak” eta “Luziferren hilezkorra” izenburuekin ondorioztatu daiteke zer-nolako istorioak kontatzen dituzten. Baina kontuz: “Izotzezko bihotza” duenak “Sarraskia” jasan dezake. Espero dezagun iruzkin honen egilearekin “Kontu garbitzea” errealitate ez bihurtzea.
(Berria egunkarian, 2017ko urriaren 15ean argitaratutako kritika)
